「星球大戰：黑暗之力」空降太古城 7大打卡位＋期間限定店

風靡全球嘅經典科幻電影《星球大戰》係唔少電影迷嘅共同回憶，當中引人入勝嘅黑暗勢力更係龐大星戰世界觀中不可或缺嘅元素。太古城中心為慶祝5月4號嘅「星球大戰日」，聯乘世界頂級珍藏人偶品牌Hot Toys即日起至6月2日期間，攜手呈獻主題展覽「星球大戰：黑暗之力」，fans一定要嚟朝聖啊！

7大經典打卡位

展覽首次集結星戰宇宙內最關鍵嘅反派人物，於6.7米高帝國終極武器「死星」等7大打卡場景登場，各位影迷準備同一眾備受矚目嘅邪惡力量角色，一齊遊歷原力黑暗面嘅旅程啦～

期間限定店：逾120款全新商品＋珍藏人偶展

除咗各個型格打卡位外，今次Hot Toys期間限定店將特別推出逾120款限定商品，包括：會場獨家限定《星球大戰》1:6比例珍藏人偶設有現貨發售同預訂、全球首發COSBABY迷你珍藏人偶、COSBI盲盒同埋電影精品等等，忠粉必須入手！

場內亦特設《星球大戰》珍藏人偶展，憑藉製作高端珍藏人偶嘅豐富經驗同頂尖雕刻塗裝工藝，跟一班電影迷分享全球首次曝光嘅極像真 《星球大戰》1：6比例珍藏人偶同珍藏載具，畀星戰迷大飽眼福，並向呢套風靡全球嘅經典科幻電影、漫畫同電視劇作品致敬。

太古城中心×Hot Toys 「星球大戰：黑暗之力」主題展覽詳情及期間限定店
日期：即日起至2024年6月2日
時間：星期一至五，12:00至21:00；星期六、日及公眾假期，11:00至晚21:00
地點：太古城中心二樓中庭及中橋