【櫻花下午茶】TEA WG X GUERLAIN　食下午茶送美妝禮品

一到春天就諗起粉紅色櫻花，如果你未去到日本賞櫻，喺香港都可以食呢個「春粉櫻花下午茶」，約埋閨密一齊喺粉紅氣氛下High Tea，仲可以免費換領GUERLAIN 美妝禮品(每份價值HK$481) ，有修護雙效精華、爽膚水、緊緻日霜同妝前底霜等，拉到最底就睇到詳細禮品喇～

茶葉品牌Tea WG 聯乘法國美容品牌GUERLAIN 推出「春粉櫻花下午茶」，以GUERLAIN 全新「春粉櫻花限定系列」嘅柔和謐靜，同埋日本庭園櫻花綻放嘅美景為靈感，創作一系列以茶入饌嘅精緻鹹甜點。

熱茶方面，Tea WG 就揀咗清新優雅嘅「櫻之頌!」(Sakura! Sakura! Tea)，糅合特選香醇綠茶同浪漫花香，香味同GUERLAIN 花草水語香氣系列中嘅櫻花基調相互呼應。

另外亦可以揀冰涼嘅「蜜糖茶」 (Honey Tea)，呢款黑茶帶有蜂蜜香氣，同GUERLAIN 嘅皇牌產品嘅蜂皇水凝黑蜂活肌蜜成分一樣咁輕盈舒爽。

「春粉櫻花下午茶」4款鹹點
鴨肝慕絲迷你多士，幼滑法國鴨肝配上天然甘甜嘅焦糖紅洋蔥、「櫻之頌!」香櫻桃蜜餞；西班牙八爪魚吞拿魚香脆玉米杯，綴上甜蜜嘅「幸運之茶」糖漿櫻桃；迷你墨汁漢堡伴融入咗「頤和園之悠香茶」嘅蛋黃醬煙三文魚雞蛋沙律；魚子醬紫薯撻佐「玄米茶」，每道鹹點都有獨特茶香。

日式調配茶靈感　茶香甜點
有櫻之頌茶香水信玄餅，配黃豆粉和黑糖漿，甘甜有豆香；抹茶紅豆歌劇院蛋糕以北海道十勝紅豆、Tea WG 頂級抹茶製成，向日本經典「宇治金時」；焙茶柚子清酒卷蛋，揉合焙煎後嘅濃郁茶香及微酸，滲透出獨特清酒香。

另外，可任選2個英式鬆餅或烘焙馬芬，配搭 Tea WG 茶香果凍同鮮忌廉，非常滿足。

Tea WG x GUERLAIN春粉櫻花下午茶套餐
售價：HK$488 (供二人享用)

供應期：2020年3月20日至5月24日

時間：每日下午3時至6時

地點：Tea WG 國際金融中心、又一城沙龍及精品店限量供應 (建議先預訂)

備註：凡惠顧Tea WG x GUERLAIN春粉櫻花下午茶套餐，即可免費換領2份GUERLAIN 美妝禮品(每份價值HK$481) ，包括殿級蜂皇再生修護雙效精華 (0.6ml x 8 片)、殿級蜂皇蜂蜜活肌精華爽膚水 (15ml)、殿級蜂皇緊緻日霜 (7ml) 及幻彩流星妝前底霜 (5ml)，數量有限，換完即止。