中秋節2024｜港九新界商場打卡+活動精選推介

中秋節點少得同屋企人一齊散吓步兼睇花燈呢？為大家整合2024年中秋好去處，睇吓可以去邊度影靚相、慶團圓喇～

奧運｜奧海城 100倍大巨型大白兔燈籠裝置+中秋食品展

今個中秋節，奧海城將傳統文化手藝「大白兔燈籠」放大100倍，以 3米高立體吹氣裝置呈現喺大家眼前，更將寓意吉祥同幸福嘅發光玉兔帶到中秋市集，畀大家可以喺中秋佳節同親朋好友跟巨型燈籠合照留念。同場更設中秋「滿夕團圓」食品展，集合唔同中秋應節食品、海味禮盒以及特色月餅， 大家可以邊行邊睇吓有咩好食。

新蒲崗｜Mikiki「秋月祭」

Mikiki商場趁中秋舉辦「秋月祭」，由即日起至10月1日，Mikiki嘅中庭A區化身成一個結合現代風格同傳統元素嘅中式「秋月庭院」，而庭院內有一組2米高巨型滿月裝置同埋可愛玉兔擺設，充滿節慶氣息，寓意人月兩團圓。同時雲集超過30間人氣特色小店進駐「秋月市集」，其中包括大排長龍嘅「民豐粉麵行」，每日限量發售開心果、榛子、花生同芝麻糯米糍！

荃灣｜荃新天地月滿中秋嘉年華

荃新天地花園廣場佈置多個可愛發光玉兔，大家可以同家人好友隨意打卡，開心歡度佳節！由即日起至9月18日期間，仲特設一系列中秋燈謎競猜、有獎攤位遊戲、街頭音樂表演以及中秋節主題手作市集。市集內有多款應節食品、咖啡花茶、花藝布藝、鈎織皮革等多樣化原創手作，大家賞月之餘仲可以享受手作嘅樂趣。

灣仔｜利東街綵燈會+「LED火龍舞鼓賀中秋」

每年中秋節，利東街都會變身成璀璨奪目嘅燈籠海，今年則特意邀請咗中國花燈大師打造金魚造型燈籠，舞動穿梭喺800個傳統燈籠之中，場面華麗。中秋節當日（9月17日）利東街將再度舉辦一年一度嘅LED舞火龍，全新打造長18米嘅LED火龍屆時將會出巡畀大家近距離觀賞同打卡，記住帶埋屋企人一齊觀賞喇。

「喜魚‧迎月」綵燈會
日期：即日起至10月15日
時間：10:00-23:00（每日17:00亮燈，中秋節正日及公眾假期延長亮燈時間至00:00）

LED火龍舞鼓賀中秋
日期：2024年9月17日（中秋節正日）
時間：20:30-21:30
舞龍路線：中庭〉皇后大道東入口〉莊士頓道入口〉中庭
備註：利東街中庭及街道兩端入口均設有定點表演