古文明神話傳說藝術作品展 潮人匯聚海港城

潮人集合！樂隊LMF成員兼藝術家Prodip Leung、潮流教父葛民輝（阿葛）同匠人工作室Taurus Workshop，首度三方聯乘打造「30°N Parallel North藝術作品展」。今次展覽以地球北緯30度嘅古文明神話傳說為創作靈感，呢個緯度上存在唔少奇妙景觀同神秘現象，例如美國密西西比河、埃及尼羅河、古埃及金字塔、中美洲瑪雅文化、中國四川三星堆等等，影響現今人類嘅哲學、科學同藝術文化發展。

兩位藝術家Prodip同阿葛，從相關嘅古文明神話汲取靈感，聯手Taurus Workshop採用多種物料以及巧妙傳統工藝，創作逾20件全新畫作同雕塑作品。精選作品包括Prodip嘅 “Odd Fellas” Artbook連瓷磚套裝、限量版版畫、Plants of Gods植物藝術容器；阿葛嘅限量版HEROIC KOGIANT樹脂雕塑及KOGIANT純銀扣針等。展覽更推出一系列周邊精品，讓大家齊齊探索地球北緯30度嘅古文明神話傳說。

同場仲有五款阿葛設計嘅KOGIANT扣針，其中四款皆由S925純銀鑄造，並分別以唔同工藝包括拉絲、磨砂、鏡面拋光、鍍金而成，各具特色，值得收藏。另外一系列周邊精品會喺展覽現場發售，包括木製線香座、「Steezey」珍藏公仔、T恤、杯墊、不鏽鋼明信片等等。

30°N Parallel North藝術作品展＠海港城
日期：即日起至2024年9月29日
時間：11:00-22:00
地點：海港城美術館，海港城海洋中心二階207號舖