秀茂坪全新「幾何動樂園」登場 佔地約12,000呎+逾10項大型遊樂設施

有新公園畀小朋友放電喇～秀茂坪商場喺上月正式啟動位於3樓頂層戶外空間嘅「幾何動樂園」，樂園佔地近12,000呎，備有超過10項大型遊樂設施，包括2.5米高巨型大象滑梯、烏龜跳彈床同埋鱷魚跳飛機，玩樂空間十足。園內更設有教育學習區，畀小朋友通過遊戲學習有關動物嘅小知識，暢玩之餘仲可以主動探索新事物。

設計靈感來自地質公園 以幾何動物為主題

「幾何動樂園」以橙色、深海藍色以及大石灰色貫穿整個園區。地板上滿佈六角形圖案，設計靈感源自香港地質公園特有嘅流紋質六角形岩柱群形態，畀小朋友即使處於大城市內，都了解到大自然唔同嘅形態。至於園區嘅設施則以幾何動物為主題，簡約幾何圖形通過選色搭配嘅運用，塑造出唔同動物造型嘅遊樂設備，例如吸引眼球嘅2.5米高幾何大象巨型滑梯、嬌小玲瓏嘅幾何小鳥裝置擺設、提升協調同彈跳技能嘅烏龜彈跳谷等等。

與VTC學生合作建幾何動物雕塑

另外，領展仲同VTC青年學院（國際課程）嘅學生合作，設計造型可愛嘅幾何動物雕塑，並於秀茂坪商場展出。呢啲作品以紙張作媒介同「幾何」為主題，並藉3D立體掃描（3D Scanning）技術將設計轉化成立體紙雕塑，畀人耳目一新嘅視覺體驗。

幾何動樂園
地址：秀茂坪商場3樓
開放時間：星期一至日：06:00-00:00