《遊戲王》25週年登陸旺角 5大卡牌展區+電子遊戲體驗+期間限定店

適逢今年係《遊戲王》卡牌遊戲問世25週年，旺角潮流文化集中地T.O.P This is Our Place（以下簡稱T.O.P）由即日起至9月30日舉辦「遊戲王公式卡片遊戲決鬥怪獸@ T.O.P This is Our Place」，當中以5大精心設計展區重現遊戲嘅精粹，場內更設有電子遊戲體驗同期間限定店等精彩活動，召喚所有「決鬥者」一齊熱血再燃啦！

五大精心設計《遊戲王》卡牌展區

憑藉精細嘅怪獸畫風、熱血戰鬥動畫劇情，同埋構築策略卡牌嘅部署，《遊戲王》喺25年間以獨特嘅魅力風靡一眾卡牌遊戲玩家，而今次精心設計咗五大《遊戲王》卡牌展區，當中6米長嘅卡牌展示牆，一次過展出逾1,600張最新卡牌，一定睇到入晒神～另外仲有展示遊戲王「三幻神」特別卡片套組（不鏽鋼製），以及同樣做成2米高嘅《遊戲王》人氣王牌怪獸「青眼の白龍」造型主體裝置、貫穿《遊戲王》故事嘅關鍵神器「千年積木」等等，絕對令粉絲睇到熱血沸騰啊。

期間限定店發售限量紀念品

期間限定店由即日起至9月8日期間，發售多款限量商品，包括遊戲王「三幻神」特別卡片套組（不鏽鋼製）、遊戲王25週年編年史side牌組團結同驕傲系列、遊戲王牌組構築包交錯破壞者Crossover Breakers、遊戲王限定周邊產品海馬瀨人⽴牌，同埋變⾊陶瓷杯等等，粉絲隨時進入《遊戲王》嘅卡牌戰鬥世界入面。

遊戲王公式卡片遊戲決鬥怪獸@ T.O.P This is Our Place
日期：即日起至9月30日
地址：旺角彌敦道700號T.O.P This is Our Place