july, 2020
Event Details
【赤柱定向賽】刺激自訂路線 帶狗狗一齊都得
唔少人都想消耗卡路里，有無諗過消耗卡路里都可以消耗得更有意義？由社企「膳動衡 FOODSPORT」主辦嘅「食物救援-城市定向挑戰賽」，透過城市定向挑戰賽，藉著定向比賽中消耗卡路里轉化成等量嘅食糧，為社區有需要人士同被遺棄或流浪狗提供均衡食物。除咗食物捐贈外，今次活動收益(包括賽事報名費) 喺扣除籌辦成本同食物捐贈後，餘款會撥作支持膳動衡嘅「社區運動」同「食物援助」計劃之用，改善社會健康、貧窮同飢餓問題。
今次定向賽會喺赤柱舉行，有男子或女子團體及個人競賽嘅「挑戰組」外，仲新設「狗狗共融繽紛組」同「親子組」，可以同自己心愛嘅狗狗同6歲以上兒童一齊參加，從中鎩練團隊精神同應變技巧。
定向挑戰賽 自訂路線
參賽者可利用大會提供地圖，喺限定時間自由策劃比賽路線，搵出各「檢查點」或完成「任務」，並使用挑戰賽嘅手機Apps 打卡攞分，以每組總分最高者/團隊勝出，考驗智力同團隊合拍性，非常刺激。大會亦增設「黃金時段」，參賽者只要喺該時段到達「檢查點」打卡取分，有機會獲得雙倍或更多分數。
參加者豐富禮品＋大抽獎機會
每位參加者都可獲得紀念T-Shirt 一件同運動防水袋一個，每隻參與嘅狗狗亦可獲得狗狗圍巾同寵物水樽一份。而且每位參賽者都會自動參與大抽獎，有機會獲得30,000 Asia Miles 里數，「繽紛組」更設全場最扮嘢大獎，參加者可為狗狗或小朋友精心打扮爭奪殊榮。
活動詳情
日期：2020年11月1日 (星期日)－賽事及狗狗海濱嘉年華
地點：赤柱
時間：「挑戰組」－上午9時半開始，包括男女混合團隊組、男子/女子團隊組、男子/女子個人組
「繽紛組」－下午1時半開始，包括親子、狗狗共融
名額：1,000人 (先到先得，額滿即止)
報名日期：即日至9月24日 (中午12時正)
註：若已報名人士未能參加11月1曰的賽事，大會可安排參加者的名額一次性免費轉讓予其親友參與。