紀念張國榮離開20週年　奧海城“Timeless Leslie Encounter”

為紀念一代巨星「哥哥」張國榮離開20週年，奧海城特意舉辦“Timeless Leslie Encounter” 活動，透過20個「相遇」故事一齊再會呢位永恆巨星張國榮。

3月23至4月2日期間去奧海城，就可一覽20個張國榮好友、工作伙伴、本地及海外歌影迷相遇故事。此外特定日子仲有活動㗎，即刻睇詳情啦～

·逢周末舉辦免費「導讀團」　翻閱絕版刊物及珍藏
逢周末大會設有免費「Timeless Leslie導讀團」，由資深「哥迷」同參加者一同細閱張國榮絕版刊物及珍藏，訴說一個又一個與哥哥有關嘅故事。
(機會難得，名額有限，報名詳情請留意奧海城Facebook專頁23/3之公佈)

·設計師陳幼堅、前排舞師Chris出席分享會
3月31日下午3時，與張國榮亦師亦友嘅工作伙伴兼著名設計師陳幼堅、前排舞師Chris Choi、本地及海外資深歌影迷，將會到奧海城現場跟市民分享佢哋同張國榮合作及相遇故事。歌手曾比特亦會於現場演繹經典金曲。

同日晚上7:45，奧海城the sky戲院將會播映張國榮其中一部震撼話題作《色情男女》，哥哥於戲內飾演鬱鬱不得志嘅導演，迫於現實生活壓力之下而接拍三級片，當晚一眾影迷可以重溫呢部經典之作。購票詳情請留意嘉禾院線/the sky facebook專頁。

·「與哥哥相遇」相片徵集活動　組成馬賽克相於超巨屏幕播放
奧海城以「與哥哥相遇」為主題，徵集由大眾遞交與張國榮相遇照片，包括與張國榮合照、張國榮唱片、電影/演唱會戲票、週邊紀念品等等，合共收集到3,000張相片，於現場430吋大屏幕上以馬賽克形式呈現，非常震撼。活動期間屏幕亦會播放20段哥哥經典作品片段，包括比賽、訪問、得獎片段及膾灸人口的MV，等大家可以喺大屏幕上重溫張國榮舞台魅力。 

留意多個打卡位！必到霓虹燈打卡牆　向經典作品致敬
現場有一幅以無限符號「∞」設計、象徵著永恆嘅張國榮經典作品霓虹燈打卡牆。載滿由世界各地歌影迷投票選出、最具代表性嘅哥哥作品，包括經典歌曲《風繼續吹》、《MONICA》、《追》、《為妳鍾情》等等；影視作品如《阿飛正傳》、《霸王別姬》、《英雄本色》等等，都係為人所認識嘅經典之作，一齊向經典作品致敬。

永恆舞台　與張國榮音樂再次相遇
商場中庭會放置一座自動演奏嘅三角鋼琴，活動期間鋼琴會演奏張國榮多首經典名曲，包括《追》、《風繼續吹》、《共同渡過》等等。

週末期間更安排多場鋼琴及音樂表演，等大家一齊感受哥哥作品魅力。同時歡迎大眾一同參與表演，以音樂向哥哥致敬，有興趣市民可以報名參加，詳情請留意Olympian City奧海城Facebook。

“Timeless Leslie Encounter”刺繡熨布貼換領
活動特製咗一套4款以張國榮經典作品為設計嘅刺繡燙布貼，當中包括象徴張國榮充滿自信嘅《I am what I am》、反映張國榮喜歡簡約嘅《無需要太多》、著名金曲《沉默是金》以及活動主題「Timeless Leslie」畀大家作留念。

由3月25日起，憑即日$800最多2間不同商戶之電子消費*；或以S+ REWARDS 20點數，即可換領一套4款刺繡燙布貼。
(數量有限，先到先得，換完即止)

珍藏展品包括「國榮盃」·珍貴禮品·相辦
20位好友、歌影迷分享與張國榮相遇故事
今次張國榮嘅好友、工作伙伴、本地、海外歌影迷將會分享佢哋同張國榮鮮為人知嘅相遇故事！眾所周知，張國榮好鍾意打麻雀，但大家又知唔知？原來佢曾同好友舉辨「Leslie Cup國榮盃」㗎～蘇施黃更奪得冠軍贏得此盃。2021年，蘇施黃就舉辦「國榮盃自我挑戰賽」，一位「哥迷」贏得此盃。奧海城活動中，將會首次展出由「哥迷」借出嘅「Leslie Cup國榮盃」獎盃，訴說哥哥對任何事都認真對待嘅態度。

另外，張國榮御用化妝師Eunice Wong亦分享哥哥喺《熱·情演唱會》中全身古銅造型背後嘅故事。原來哥哥為咗希望呈古銅膚色，曾叫Eunice四出搵顏料同調色，令佢嘅皮膚古銅得嚟又可以金光閃閃。最後佢哋特別從英國訂返嚟，每晚將哥哥全身到腳都塗滿今次活動首次展出嘅古銅閃粉，可見哥哥一絲不苟嘅態度。

海外歌迷分享深刻經歷
除咗有本地歌影迷嘅相遇故事，張國榮對海外歌影迷亦有深刻經歷。不但有韓國及日本出版社紛紛為張國榮出書，當中一位日本超級「哥迷」兼插畫師參加過90年代「哥哥的日本歌影迷旅行團」，走遍偶像參演嘅電影場景並有幸於見面會同哥哥握手。

韓國資深「哥迷」則由80、90年代開始收集哥哥喺韓國嘅各種刊物，更將於3月31日遠道而來親身細訴。而本地「哥迷」亦特別借出極珍貴並首度展出的哥哥《Day Dreamin’》簽名唱片，呢張唱片係1978發行嘅首張張國榮錄音室專輯，發行量只有500張。

奧海城Timeless Leslie Encounter
日期: 2023年3月23日至4月2日
時間: 中午12時至晚上9時
地點: 奧海城2期地下主題中庭

「Timeless Leslie導讀團」
報名日期: 2023年3月23日起
報名辦法: Olympian City奧海城 Facebook 

Timeless Leslie Encounter 分享會
日期: 2023年3月31日 (星期五)
時間: 下午3時
地點: 奧海城2期地下主題中庭

Timeless Leslie Encounter 刺繡熨布貼換領
換領日期: 2023年3月25日 (星期六)至換完即止
換領方法: 憑即日$800最多2間不同商戶之電子消費*或以S+ REWARDS 20點數，即可換領一套四款以張國榮經典作品為設計的刺繡燙布貼
換領地點: 奧海城2期地下主題中庭