【新年2025好去處】全港20大商場新春主題打卡位+活動詳情

新年仲有唔夠一個月就到啦，除咗去拜年，全港多個商場仲佈局咗唔同新春裝置畀大家去玩吓兼打卡，即睇推介喇～（持續更新）

 

【港島】

皇室堡x Pingu暖笠笠鈎織雪樂園

熱愛歷險嘅人氣企鵝Pingu，今個農曆新年將帶同整個家族由南極洲越洋來到皇室堡「旅居」！！由2025年1月9日至2月16日攜手打造【皇室堡 x Pingu™ 暖笠笠鈎織雪樂園】，勢要同大家過一個溫馨又愉快嘅新年～園內設3大打卡位同互動玩樂區，其中最矚目一定係2米高Pingu休閒咁坐喺中央嘅「七彩鈎織小部屋」，造型超可愛啊！！Pingu今次仲帶嚟【皇室堡 x Pingu期間限定店】，出售限定Pingu主題精選產品。

【皇室堡x Pingu™ 暖笠笠鈎織雪樂園】活動詳情
日期：2025年1月9日至2月16日
時間：10:00-22:00
地點：皇室堡地下中庭

【皇室堡 x Pingu™期間限定店】開放詳情
日期：2025年1月9日至2月16日
時間：12:00-21:00
地點：皇室堡地下中庭

 

太古城中心 x 可口可樂首度打造復古餐廳

農曆新年最開心莫過於同親友相聚，太古城中心聯乘可口可樂由1月16日至2月16日期間，首次以復古餐廳概念打造6大打卡同互動區域。現場仲可以玩盡一系列活動同裝置，包括薯條求籤以及茄汁籤文，同時亦可以利用現場獨家新春版可口可樂®徽章，DIY「快樂圍裙套裝」等等！

太古城中心 x 可口可樂開放詳情
日期：2025年1月16日至2月16日
地點：太古城中心二樓

 

北角匯×Dustykid塵新春聯手呈獻「好運蛇蛇蛇蛇進來」

北角匯於即日起至2月16日，特別同本地療癒圖文創作品牌「Dustykid塵」聯乘舉辦新春主題活動，其中有6大蛇年必玩活動同多個喜慶打卡位，貼滿塵創意祝福賀詞同專設得意場景，誠邀大家嚟「塵家」拜年！《塵新春限定店》亦預備咗一系列全新主題賀年精品，包括逾300款揮春、御守、祈願繪馬、攬枕以及衛衣等限量新品，方便大家拜年前嚟入貨。

北角匯×Dustykid 主題展覽【好運蛇蛇蛇蛇進來】詳情
日期：即日起至2月16日
時間：12:00-22:00
地點：北角匯二期2樓214號舖（近燒肉Like餐廳）；北角匯一期（酒店基座商場）1樓105及108號舖（近The Tokyo Trend店）

 

灣仔利東街新春 「喜慶燈海迎新春」

祥龍辭歲，金蛇獻瑞。利東街新年延續傳統，繼續張燈結綵，迎接乙巳年到來！利東街以「喜慶燈海迎新春」為主題，逾800個豔紅金碧嘅燈籠點亮整條林蔭大道半空，並首現璀璨奪目、寓意財氣滾滾、喜氣盈門嘅金黃色燈籠。中庭更特別設置共12棵近4米高嘅粉紅桃花樹園及巨形心形拱門，當夜燈亮起，浪漫氛圍彌漫成條利東街，寄寓有情人終成眷屬！年初一至四仲會舉行特色傳統醒獅表演兼大派傳統賀年食品，節目相當豐富。

利東街新春呈獻「喜慶燈海迎新春」詳情
日期：即日起至3月2日
時間：10:00-23:00（每日17:00亮燈）
*由1月14日至2月14日，逢星期五至日、公眾假期、元宵及情人節，亮燈時間將延長至00:00
地點：灣仔利東街

 

時代廣場×日本插畫大師北澤平祐呈獻《幸運棋緣》迎新春

銅鑼灣時代廣場聯同日本知名插畫大師北澤平祐呈獻《幸運棋緣》迎新春企劃，早前率先推出「幸運棋緣」利是封以及「萬花棋緣」棋盤遊戲，傳遞新春祝福，最近更將一系列插畫實體化，好似露天廣場化身色彩繽紛嘅巨型棋盤，以夢幻方式呈現巨型金元寶、年糖、棋子、風車等等，仲設有互動許願樹遊戲畀大家互動！此外，8隻可愛嬌盈嘅「巨型幸運招財貓」，分別會喺2樓中庭同10樓食通天為大家招財納福，大家可以同每隻拍照留念，收集所有財氣！

時代廣場《幸運棋緣》迎新春詳情
日期：即日起至2025年2月16日
時間︰10:00-22:00
地點︰銅鑼灣時代廣場露天廣場、2樓中庭及10樓食通天

 

【九龍】

尖沙咀【iSQUARE國際廣場 福氣滿滿玩轉肥年】

2025蛇年乙巳年已經急不及待緊接聖誕來臨喇！今年iSQUARE聯乘3大本地人氣插畫家包括：圓DUM DUR、Hello Wong同豚豚，齊齊按筆下「圓圓哋、有肉哋」嘅角色，創出9大開運能量點，一眼望見超吸睛嘅開運燦笑6米高大桔，來年必定笑口常開、大吉大利！商場1月至2月指定星期六、日仲會同時舉辦新春市集賀新歲，為大家好好準備新年賀禮～

【iSQUARE國際廣場 福氣滿滿玩轉肥年】活動詳情
日期：2025年1月10日至2025年2月23日
時間：10:30-22:30
地點：地下iPIAZZA、3樓iFUNCTION、大堂樓層iEXHIBITION

新春市集賀新歲
日期：2025年1月11、12 、18、19日；2月8、9、15及16日 （星期六及日）
插畫師期間限定店開放日期：圓DUM DUR（2025年1月11、12日；2月8及9日）、Hello Wong（2025年1月11、12 日；18及19日）、豚豚（2025年2月8、9、15及16日）
時間：中午12時至晚上8時
地點： 3樓iFUNCTION

 

MOSTown新港城中心 x LEGO春日開運花園

由2025年1月10日至2月16日，MOSTown新港城中心呈獻「MOSTown新港城中心 x LEGO春日開運花園」，花園內特設4大新春最旺打卡位同埋14大遊樂區，其中特別邀請亞太區LEGO專業認證大師之一Andy Hung洪子健為花園設計新春裝置，用咗超過680,000粒LEGO積木，砌出合共 6,888支鮮艷奪目嘅LEGO Botanical系列花朵，絕對係全港最大嘅「樂高Botanical系列花海」，LEGO迷一定要嚟朝聖啊！

「MOSTown x LEGO春日開運花園」活動詳情
日期：2025年1月10日至2025年2月16日
時間：
主題打卡區：10:00-22:00
玩樂區：12:00-20:00
LEGO開運迎新春期間限定店：12:00-21:00
地點：MOSTown 新港城中心L2天幕廣場及L3天橋活動區 （港鐵馬鞍山站B出口）

 

MOKO x Cheeky Cheeky 新春「厚面的愛抱抱節」

有專家話過，一日抱抱8次可以令人減壓，有助身體釋放「天然嗎啡」安多酚。適逢1月21日係「國際擁抱節」，旺角MOKO新世紀廣場誠邀本地人氣插畫家Cheeky Cheeky厚面子，於場內打造筆下首個旺角限定主題裝置，以花墟、金魚街等經典本土地標為靈感，帶大家喺今個新春玩盡5大繽紛街頭風打卡蒲點！

「MOKO x Cheeky Cheeky 厚面的愛抱抱節」主題裝置開放詳情
日期：即日起至2月23日
時間：10:00-22:00
地點：MOKO新世紀廣場MTR層中庭

 

MCP 新都城中心 x LEGO®新春開運遊樂園

將軍澳 MCP新都城中心將化身大型LEGO遊樂園，大人細路可以免費探索5大必玩遊戲區，包括4米高巨型「MCP開運彈珠台」、肥嘟嘟招財福貓親自坐陣「貓肥屋潤主子殿」、巨型3.5米高LEGO®桃花樹下嘅「大吉大利許願池」、畀小朋友DIY吉祥圖案嘅「LEGO® DUPLO行運花車」以及充滿動感賀歲賽車嘅「步步『GO』昇極速挑戰」。

「MCP 新都城中心 x LEGO新春開運遊樂園」活動詳情
日期：2025年1月11日至2025年2月16日
時間：
主題打卡區：10:00-22:00
遊戲區：星期一至五（公眾假期除外）：13:00-17:00；星期六、日及公眾假期：12:00-20:00
地點：MCP CENTRAL（新都城中心2期）L1天幕廣場（港鐵寶琳站A出口）

 

The ONE x SHO-CHAN 幸運新年「燦」住你

日本人氣表情包貼圖角色「SHO-CHAN」（燦子）以一系列鬼馬可愛表情包配上啜核字句，散發無限活力成功俘虜一眾粉絲！今個農曆新年，接地氣嘅主角燦子聯同家人同小伙伴，一齊駕臨尖沙咀。一入場就有最矚目嘅「3.5米高巨型招『燦』貓」迎接大家，隔籬仲有KUMA坐鎮嘅「燦子必然幸運機」，結合老虎機同新年必玩嘅「魚蝦蟹」元素，試試手氣都開心啦～～

【The ONE x SHO-CHAN 幸運新年「燦」住你】開放詳情
日期：2025年1月10日至2月16日
時間：10:00-22:00
地點：尖沙咀The ONE UG2中庭

 

MegaBox x mofusand 福貓花見駅

MegaBox同日本人氣療癒系貓咪mofusand攜手合作，由即日起至2025年2月16日期間，於MegaBox 5樓中庭推出「MegaBox x mofusand福貓花見駅」。中庭設置咗10大喜慶打卡位，當中包括三大互動祈願裝置，沿途亦可以去「福貓號列車」欣賞花海美景，感受至「灜」嘅新年氣氛！！

【The ONE x SHO-CHAN 幸運新年「燦」住你】開放詳情
日期：即日起至2025年2月16日
地點：MegaBox L5
時間：12:00-21:00

 

置富Malls x Mr.PA拜年日記

熊貓熱潮席捲全港，今年新年置富Malls邀得網路「熊」人 Mr.PA耙老師，帶領夥伴包括：折耳兔小綿、小雞垃嘰、小象包包同埋青蛙皮總，走入置富Malls旗下4大商場，大家分別可以喺馬鞍山廣場、+WOO嘉湖、紅磡置富都會以及沙田置富第一城，見到可愛裝置，同大家共同邁進蛇年，送上綿綿祝福！新春期間，可以去埋馬鞍山廣場、置富第一城同埋+WOO嘉湖，參與Mr.PA與「熊」抱抱見面會，接接財神打打卡，明年必定富貴迫人來！

「置富Malls x Mr.PA拜年日記」詳情
日期：即日起至3月16日
地點：
置富第一城：新界沙田第一城銀城街1號、2號
置富都會：九龍紅磡都會道6號
馬鞍山廣場：新界馬鞍山西沙路608號
+WOO嘉湖：新界天水圍天恩硌12-18號

Mr. PA與「熊」抱抱見面會
場次一：1月12日15:30馬鞍山廣場
場次二：1月19日12:00置富第一城
場次三：1月19日15:00+WOO嘉湖
參加方法：顧客凡Like或Follow商場專頁，並出示予工作人員查閱，即可現場同Mr.PA合照乙次

 

全港首個Sesame Street x LINE FRIENDS聯乘造型登陸荷里活廣場

Sesame Street破天荒聯乘LINE FRIENDS登陸荷里活廣場！！Sesame Street可愛角色，包括Elmo、Cookie Monster、Big Bird，同LINE FRIENDS 可愛角色LINE FRIENDS BROWN、CONY及SALLY，搖身一變換上全新可愛Sesame Street x LINE FRIENDS聯乘造型，以雙倍可愛現場現身萌爆一眾Fans～現場設有6米高「盤滿缽滿糖果滑梯」、「財源滾滾氹氹轉」打卡位、「甜蜜光影庭園」等等，好值得一去。

「Sesame Street x LINE FRIENDS at Plaza Hollywood新春甜蜜派對」詳情
日期：即日起至2月16日
時間：10:00-22:00
地址：鑽石山荷里活廣場1樓明星廣場

 

尖沙咀海港城「彩獅鼓躍」農曆新年佈置

海港城今年同姜氏金龍醒獅團負責人姜偉池（三姜）囓「獅王無用」品牌及，以著名玄學風水專家李丞責博士攜手合作，於海運大廈露天廣場設置嘅28米長「百彩醒獅長廊」，一次過展出13個傳統中國鼓同埋18頭醒獅，寓意「一生實發」，期望各行各業事事暢旺。三姜特意製作18頭唔同顏色嘅醒獅，每款顏色都承載住獨特嘅新春祝賀。另外，長廊同時設置8個平鼓及5個企鼓，當中6個「特色」平鼓更以唔同顏色配上「旺、吉、鴻、桃、智、祿」嘅祝願，畀大家摸摸獅頭，鴻運當頭；敲起開運大鼓，敲響新春好意頭。

海港城「彩獅鼓躍」農曆新年佈置詳情
日期：即日起至2月16日
時間：10:00-22:00（新春開運卡換領時間：12:00-20:00）
地點：海港城海運大廈露天廣場 及 海運大廈地下中庭

 

旺角朗豪坊20周年頭炮活動《魚樂漣年》

作為城中潮流同文化熱點，朗豪坊迎來20周年，以「WoW!WePLAY」為品牌定位，運用無限創意推動本地創作及旺角社區潮流文化，展現充滿玩味的生活態度。今個新春特別邀請本地版畫藝術家兼紋身師李寧首次跨界合作，以旺角「金魚街」為靈感，結合象徵吉祥和幸福嘅金魚，由即日起至2月16日，呈獻全港首個金魚藝術體驗館《魚樂漣年》。體驗館內設有3大「游魚遊戲」互動裝置，畀大家化身快樂小金魚，以嶄新視角探索世界。其中「金魚7秒忘憂區」仲會送你限量版漂流金魚記憶卡，寫下煩惱隨水消散，有種莫名浪漫！另設「快樂金魚照相館」同「幻游未來水族館」畀大家齊齊發掘。

朗豪坊《魚樂漣年》全港首個金魚藝術體驗館
日期：即日起至2月16日
時間：
體驗館：11:00-23:00
快樂金魚照相館：11:00-23:00
金魚7秒忘憂區：14:00-19:00
地點：朗豪坊4樓通天廣場

 

Mira Place『陶』花祈緣——全港首個陶瓷花藝裝置

全港首個新春陶瓷花藝裝置「『陶』花祈緣」由即日起至2月16日可以喺尖沙咀Mira Place搵到啦～以陶瓷花以及光影繁花打造超過3,000朵極致華麗嘅花卉盛宴，當中3大打卡熱點首推由新晉陶瓷藝術家Greg Kuang，用咗188朵陶瓷花配繁花環繞創作嘅6米高巨型「幸福祥蛇」，陶瓷花以5大吉祥年花作主角，包括象徵富貴繁榮嘅牡丹、吸引好人緣嘅桃花、寓意吉祥嘅蝴蝶蘭、多福多壽嘅菊花，同埋有百年好合之意嘅百合，伴隨一整年嘅好運與吉祥！

Mira Place「『陶』花祈緣」新春裝置
日期：即日起至2月16日
時間：10:00-22:00
地點：Mira Place 1 中庭

 

【新界】

如心廣場 x 乖巧寶寶《招財進「寶」迎新春》

人氣表情貼圖IP 「QUBY 乖巧寶寶」由1月10日至2月16日登陸如心廣場，乖巧寶寶將破天荒化身財神，帶住靈蛇寶貝空降6大Cute爆互動打卡位，例如頭戴財神帽嘅3D乖巧寶寶捧著巨型「如心金元寶」、鼓舞吉祥嘅2米高靈蛇等等，今個蛇年人人都係福氣滿滿嘅寶貝！

如心廣場 x 乖巧寶寶《招財進「寶」迎新春》打卡裝置及市集
日期：1月10日至2月14日（打卡裝置）；1月10日至2月16日（市集）
時間：12:00-21:00
打卡裝置地點：如心廣場一期 1/F 中庭（星期一至日）及2/F（逢星期六及日）
市集地點：如心廣場二期 1/F（逢星期六及日）

 

荃灣廣場「PIXAR幸運達『MORE』春日祭」

新一年，當然祈求幸運達「MORE」， 好事連連！今個新年，荃灣廣場呈獻首個PIXAR DARUMA 商場裝置，由1月10日至2月16日匠心打造「PIXAR 幸運達『MORE』春日祭」，多個人氣HIT爆的PIXAR角色將化身為招福達摩登陸荃灣廣場。其中設有5大打卡位，包括L5空中樂園嘅「3米高勞蘇及PIXAR角色幸運達摩陣」，可愛值爆燈！

荃灣廣場「PIXAR幸運達『MORE』春日祭」活動詳情
日期：2025年1月10日-2月16日
時間：10:00-22:00
地點：荃灣廣場L5空中樂園及L1長廊

 

海洋公園大熊貓IP首次登陸新都會廣場

全城最「熊」！全城關注嘅大熊貓「安安」、「可可」、「盈盈」、「樂樂」以及一對龍鳳胎寶寶「家姐」、「細佬」萌度持續上升！今個新春，新都會廣場由即日起至2月28日特別聯乘海洋公園全新大熊貓IP呈獻【熊貓「蘋」安慶新年】，最矚目必定係3大喜慶打卡位登陸L4露天廣場，包括3米高龍鳳胎寶寶喺竹林內快樂賣萌、「盈盈」同「樂樂」陪伴大家轉轉吉祥竹筒，仲有「安安」、「可可」坐鎮嘅「蘋」安幸運求籤筒，一家大細一齊嚟沾沾熊貓嘅可愛旺氣！

新都會廣場×香港海洋公園【熊貓「蘋」安慶新年】詳情
日期：即日起至2月28日
時間：10:00-22:00
地點：新都會廣場L3 ＆ L4露天廣場

 

沙田馬場 農曆新年賽馬日

由香港賽馬會舉辦一年一度嘅「農曆新年賽馬日」即將於大年初三（1月31日） 喺沙田馬場隆重舉行！往年有唔少香港人都會親臨馬場行大運，而今年有3大入場必睇嘅焦點賽事，包括醒獅賀新歲開幕儀式，祝願大家馬運亨通、心想事成！亦有人氣歌手張敬軒擔任新春綜合匯演表演嘉賓炒熱氣氛，化身「吉星」向大家拜年。現場仲特設巨型打卡裝置「財來運起風水陣」同新春花車畀大家盡情打卡留念。當日有免費穿梭巴士服務接載市民由車公廟（近大圍站）及黃大仙站（正德街D2出口）前往沙田馬場！

「農曆新年賽馬日」詳情
日期：1月31日（星期五）
時間：10:30開放入場，11:15綜合匯演，12:30首場開跑
地點：沙田馬場
查詢電話：1817
免費穿梭巴士：1月31日將喺車公廟（近大圍站）及黃大仙站設有免費穿梭巴士服務前往沙田馬場，詳細請參閱活動主題網頁