全新3米高元祖高達首次震撼現身屯門 慶祝Gundam 45周年

《機動戰士高達》自1979年問世以嚟，已成為日本動畫史上嘅經典，每位主角駕駛住高達以動感與同熱血姿態現身，係好多人珍貴嘅童年回憶！適逢《機動戰士高達》面世45周年，信和集團旗下屯門市廣場特別聯乘Bandai Namco，於即日起至2025年1月1日，舉辦「Mobile Suit Gundam 45th Anniversary @tmtplaza」，畀一班高達迷重溫童年！

全新RX-78-2立像震撼登場 超精細打造機體每個細節

活動期間，會有首次現身、全新打造嘅3米高元祖經典「RX-78-2高達」立像將於屯門市廣場中央廣場震撼現身，手持經典鐳射步槍同專屬盾牌，每個機體細節嘅精細程度絕對令一眾高達粉絲嘆為觀止。除咗裝甲表面常見嘅線條、凹槽等部份外，一啲部件接合處、部件內面等組裝後睇唔見嘅地方都有精密嘅內構雕刻，甚至連機體手腕、手指以及腿部關節等細位都極其仔細，高達迷一定要嚟朝聖！此外，4米高嘅充氣造型SD RX-78-2高達亦會首度登場㗎～

6.3米高巨型哈囉主題聖誕樹 45個高達掛飾迎接聖誕佳節

聖誕佳節臨近，屯門市廣場嘅中庭將會豎立一棵以哈囉為主題、6.3米高嘅巨型聖誕樹。聖誕樹上掛滿紅、藍、黃經典高達顏色嘅哈囉掛飾，仲有45個經典高達模型化身成聖誕掛飾慶祝45周年，高達迷緊記要細心欣賞聖誕樹上每個掛飾啊。唔好唔記得聖誕樹旁邊另一必到打卡點：3米高巨型充氣哈囉趣緻可愛，戴住聖誕帽充當親善大使，歡迎大家打卡，留下難忘嘅聖誕回憶！

高達迷必搶！會場特設期間限定店 分階段發售近40款獨家模型

一班高達粉絲必定最期待限定產品！活動期間，屯門市廣場將設有高達模型期間限定店，提供過百款高達模型產品，當中近40款仲會係會場首發嘅限量版高達模型！最新詳情記住留意BandaiHobby同埋屯門市廣場Facebook公布喇！只要喺期間限定店作任何消費，即可加$10換購會場限定高達購物袋乙個，而消費滿$400，即可獲贈限量高達45周年紀念亞加力立牌乙個，極具收藏價值。

屯門市廣場X Bandai Namco呈獻 「Mobile Suit Gundam 45th Anniversary @tmtplaza」
日期：即日起至2025年1月1日
時間：11:00-21:00
地點：屯門市廣場1期1樓中央廣場

BANDAI高達模型期間限定店
日期：即日起至2025年1月1日
時間：11:00-21:00
地點：屯門市廣場1期1樓中央廣場