【2023新年遊】精選商場新春打卡點+年宵/市集（隨時更新）

農曆新年將至，今年各大商場以兔年為題嘅打卡裝置各有特色，有Q版 、優雅、華麗等風格，甚至有年宵市集/攤位畀大家掃貨、換領新春禮品～

1月10日更新

旺角 朗豪坊｜《春日「貓」遊遊》+mofusand期間限定店

可愛貓咪變兔仔！朗豪坊今年請嚟日本人氣貓咪KOL mofusand，呈獻《春日「貓」遊遊》 ，同大家行盡5大東瀛神社祈願打卡熱點；場內特設Pop-up Store，逾300款會場限定mofusand精品！即場登記做LP CLUB新會員，或者邀請朋友成為會員，更可參加「喵聲福到開運預測」，首5,000名完成開運預測嘅會員，可以得到「喵住你四圍去開運行李牌」1個，咁去旅行自然有福氣又好運啦～

《朗豪坊 × mofusand 春日貓遊遊》
日期：即日起至2023年2月5日
時間：11:00-22:00
地點：朗豪坊4樓通天廣場

 

銅鑼灣 時代廣場｜日式招福開運慶典+迪士尼期間限定精品

迪士尼成員以可愛招財貓同達摩造型空降時代廣場！地面露天廣場有2米高巨型招財貓設計嘅米奇、唐老鴨，以及5.5米長嘅日式開運隧道，入面掛上逾百個米奇設計燈籠、「得米」同「開運」祝賀帆布；2樓則設有期間限定店，門前有1米高嘅達摩米奇同唐老鴨外，更發售期間限定「URDU福部屋－迪士尼系列」精品，畀你打完卡重可以帶一眾成員返屋企！

時代廣場Mickey Mouse & Donald Duck「招福開運慶典」
日期：即日起至2023年2月5日
時間：10:00-22:00
地點：銅鑼灣勿地臣街1號時代廣場露天廣場及2樓

 

中環 PMQ｜不倒翁兔仔互動裝置

PMQ元創方地面中庭，將呈現可以同你互動嘅「春暖花開 福兔滿堂」賀年裝置。68隻唔同大細、圓潤飽滿嘅不倒翁兔仔，可以隨意拍打或擁抱，來回搖晃都屹立不倒；於PMQ社交平台分享同福兔合影嘅全家福玩遊戲，有機會贏取即影即有相機。而活動期間，於場內作任何消費，憑即日收據可換領由本地設計團隊Future Dept. × COMING-SOON Studio製作嘅「花開福兔」鎖匙扣。

「春暖花開 福兔滿堂」 2023年農曆新年裝置
日期：2023年1月13日至2月5日
時間：11:00-19:00
地點：PMQ元創方地面廣場

 

1月5日更新

尖沙咀 LCX｜韓式粉紅賀年派對+新春小攤檔

韓國人氣高企嘅Esther Bunny會現身LCX呀！以紅粉緋緋嘅形象同大家度過兔年！可愛甜蜜嘅「甜蜜常滿糖果盒」、「美兔廚房」、「美貌世一」等裝置，打卡啱晒，而定期轉換嘅「鴻兔大展新春小檔」 ，以及附近嘅潮牌服裝品牌、糖果店、香薰品牌及茶品等，都推出送禮自用相宜嘅賀年禮物。

LCX × Esther Bunny「紅粉緋緋迎兔年」展覽及活動
日期：2023 年1月6日至2023年2月19日（2月1日起將變成情人節主題）
時間：10:00-22:00
地點：尖沙咀海港城海運大廈三階 LCX 正門及Xplus 對出

 

旺角 新世紀廣場｜日系櫻花主題佈置+新春花墟賞

MOKO新世紀廣場聯乘本地日系插畫家Mr.Japin，於1月12日至2月14日期間呈獻「春日櫻花緣」日系主題佈置，將港人熟悉嘅日本吉祥物︰招財貓、飯糰、富士山同達摩，以可愛大眼仔造型嘅打卡裝置，帶領大家遊覽漫天櫻花嘅「日系景點」，齊齊迎春接福！MOKO更推出一連串購物獎賞，包括換領利是封、新春花墟賞以及冬日跨年大抽獎，顧客有機會贏取TOYOTA Sienta 7座豪華版房車！

「MOKO x Mr. Japin新春利是封」換領詳情
換領日期：2023年1月6日至1月21日
換領時間：10:00-22:00
換領地點：MOKO L1顧客服務中心
換領方法：The Point會員憑3,000分 或 顧客憑即日電子消費滿HK$500（The Point會員可同時賺取積分）即可換領利是封1套（1式4款共8個），名額共5,100套

「新春花墟賞」換領詳情
禮品：HK$100新年及情人節電子禮券 + 2小時免費泊車
換領日期：2023年1月6日至2月14日
換領時間：10:00-22:00
換領地點：MOKOL1 顧客服務中心
換領方法：The Point會員出示旺角花墟購物嘅發票或年花，以及場內即日HK$100電子消費單據，即可換領「HK$100新年及情人節電子禮券」、2小時免費泊車券，名額共6,000份

 

將軍澳 新都城中心｜桃氣福兔迎新春+年宵攤位

新都城中心二期及三期，由1月6日起至1月21日以「桃氣福兔迎新春」為題，場內設置逾5,000呎嘅大型「福兔開運年宵」同「福兔櫻花園」，可以辦年貨、買年花之外，MCP DISCOVERY嘅新春遊戲攤位更齊集4大經典攤位遊戲，重溫童年回憶兼贏取新春小禮品，為新一年來嚟好兆頭～

 

「福兔開運年宵」
日期：2023年1月6日至1月21日
時間：11:00-21:00（個別年宵攤位於特別日子嘅營業時間有所變動）
地點：新都城中心二期L1天幕廣場

「福兔櫻花園」
日期：2023年1月6日至2月5日
時間：10:00-22:00
地點：新都城中心三期L1天幕廣場

四大經典年宵攤位
日期：2023年1月6日至1月21日
時間：12:00-20:00
地點：新都城中心三期) L1 天幕廣場

葵芳 新都會廣場｜「果藝甜園」

新都會廣場於新春橫跨情人節期間，以浪漫滿分嘅「果藝甜園」，喺露天廣場內構建多個水果主題驛站，祝福大家豐衣足食、事事順利。另外以新春花卉為題，推出百合、水仙、桃花同蝴蝶蘭圖案嘅「豐盈花語」利是封畀大家換領。

 

圖：商場（FB）