【超可愛】本港首個！P助同粉紅兔兔卡通農莊

日本插畫家Kanahei 創作嘅P助同粉紅兔兔，同一班「萌」友登陸葵芳新都會廣場，將綠色有機生活融合卡通元素，打造本港首個P助與粉紅兔兔卡通農莊！

主題卡通農莊　近10呎高巨型粉紅兔兔
P助同粉紅兔兔會出現喺空中花園同商場中庭～首先踏入5樓嘅空中花園，會穿過圓拱型叢林隧道，就見到近10呎嘅粉紅兔兔戴上農夫草帽；P助隔籬就放住一籃新鮮士多啤梨，用可愛農夫造型迎接大家。

Kanahei’s Small animals 合力打理農莊4大種植區
P 助與粉紅兔兔卡通農莊共分為4大種植區，包括香草區、蔬菜區、瓜果區同食用花專區。喺呢度，粉紅兔兔正乖乖地查閱種植指南，致力種出茄子、青瓜等瓜果；另一邊，趣怪粉紅兔兔就著上士多啤梨套裝同P助一齊照顧食用花。

巨型粉紅兔兔菠蘿裝置
嚟到卡通農莊左邊，即見到一座高逾6.5呎嘅粉紅兔兔匿埋喺菠蘿中，為遊人打打氣。粉紅兔兔身後嘅竹棚更附有小光燈，入夜後亮起令菠蘿望落更香甜多汁。粉絲快啲同佢哋影相打卡，讚賞粉紅兔兔照顧農作物嘅努力啦。

可愛別緻「農莊地圖」
喺巨型菠蘿轉身一睇，即會見到P助同粉紅兔兔精心炮製嘅「農莊地圖」，仔細描繪各種繽紛農作物位置，更標示一眾「萌」友身處地，令粉絲即刻搵到佢哋。地圖更附上「蔬果大作戰」遊戲指南，跟住佢哋收集各種蔬果，完成遊戲贏取獎賞啦～

大玩收集有機蔬果遊戲　換取指定優惠券
只要用手機喺有機蔬果遊戲內尋找收割工具，並幫P助同粉紅兔兔收集各種蔬果，成功收集指定蔬果即可獲得優惠券喇。

Jungle Party 森之派對　中庭多個打卡位
除咗空中花園，商場中庭仲有充滿夏日氣息嘅棕櫚樹群，配合首次以漫畫風格呈現嘅Kanahei’s Small animals，好有新鮮感。

首次喺香港以11呎高造型登場嘅巨型粉紅兔兔，張開雙臂邀請大家，為叢林派對熱身！

叢林派對正式開始！調皮愛玩粉紅兔兔換上探險家服裝，企喺長頸鹿先生隔籬。

P助同粉紅兔兔向前行遇上肥嘟嘟嘅蠎蛇小姐，忍唔住抱起佢，同行嘅小動物亦同變色龍玩得好開心。

活動詳情
Jungle Party 森之派對
日期： 即日起至8月31日
時間：上午10 時至晚上10時
地點： L3中庭

主題卡通農莊
日期：即日起至2021年1月3日
時間：上午10時至晚上10時
地點：L5空中花園