海港城慈善聖誕熊溫暖登場 必到戶外聖誕燈飾花園x聖誕帳幕打卡

今年海港城以「Christmas Every Day」為主題，慈善聖誕熊會出現喺唔同地方為大家送上節日祝福同歡樂！因應新冠肺炎疫情，聖誕裝置會以欣賞及影相為主，部分聖誕裝置會移師至室外嘅海運觀點，海景加上聖誕裝飾更浪漫。

打卡點1：巨型幻彩聖誕熊仔玩具店
海運大廈樓梯入口變成巨型幻彩聖誕熊仔玩具店，以現代歐陸風格木屋加上透明幻彩櫥窗營造色彩繽紛嘅歡樂氣息，夜間兩邊嘅屏幕仲會播放播放聖誕音樂動畫，加上星星燈更有氣氛。門口仲有隻3米高嘅聖誕熊，嚟歡迎大家踏入幻彩聖誕木屋！

打卡點2：自訂慈善熊仔服飾店
今年嘅慈善聖誕熊繼續為「香港血癌基金」籌款，只要捐款$50就可以抽一張遊戲卡，憑卡上號碼喺位於海運大廈3樓嘅熊仔服飾店換領聖誕熊，及選擇聖誕服飾。另捐款$20，更可即場繡上自訂英文字母或數字，將獨一無二又有紀念價值嘅毛毛慈善聖誕熊帶返屋企。

打卡點3：戶外聖誕燈飾花園
知道大家都掛住坐飛機旅遊嘅感覺，海運觀點戶外平台特設往芬蘭嘅登機閘口，畀大家去海旁嘅登機閘口打卡。平台更放滿幻彩四葉草、雪花燈球及LED燈海，打造成耀目迷人嘅聖誕燈飾花園！注意為控制人數，每日6pm至10:30pm需於網上免費預約登記入場，工作人員亦會為入場人士量度體溫及提供消毒搓手液。

打卡點4：草坪可愛聖誕營火會
海運觀點戶外草坪亦擺放咗六個換上聖誕裝飾嘅帳幕，分別有適合一家大細打卡嘅家居風，最啱二人世界嘅北歐風，同小朋友最愛嘅可愛風！毛毛慈善聖誕熊亦會喺帳幕裡面出現，同大家一齊嚟個溫馨聖誕營火會。

海港城 Christmas Every Day 
日期︰2020年11月21日至2021年1月3日（熊仔服飾店2020年11月28日起）
地點︰海港城海運大廈及海運觀點
查詢︰2118 8666