【去郊區散心】免費玩滑草、睇日落
Updated: 04/02/2020
近排想散吓心,去郊區都係一個好選擇,喺氹仔東面嘅大潭山郊野公園就有個人造滑草場,而且入場免費,大人小朋友都玩得㗎!滑草地位於山上,滑草時仲可以遠眺澳門機場景色,心情都舒暢啲。溫馨提示出門前一定要留意外面情況,時刻保持雙手清潔,保障自己同他人健康喔!
大潭山郊野公園喺機場附近,雖然無巴士直達,但其實搭車至機場步行大約20分鐘就到。去到公園門口,行5分鐘就到滑草場喇~
其實大潭山郊野公園係山林地帶,有綠蔭長廊、大潭山步行徑等,沿路都可以欣賞園林風景同呼吸新鮮空氣。園內仲有「浴火鳳凰」台灣相思、荷木、木麻黃叢生嘅特別樹形,玩完滑草、睇完風景,仲可以喺度睇埋日落㗎。
滑草場大約50米長唔算好高,但滑落順暢仲有少少離心力,輕鬆玩之餘又幾刺激。而且入場免費,幾抵玩。
相片來源:澳門自然網