澳門傳說遊!消災除難大三巴哪吒廟
Updated: 08/11/2019
對澳門人嚟講,哪吒唔淨止係《封神榜》內出現嘅一個神話人物,更加係會為佢哋驅邪闢災嘅神明。
每年農曆5月18日係哪吒誕,喺呢日,會有醒獅採青巡遊、傳統飄色巡遊、哪吒太子出巡大典等等慶祝活動,好不熱鬧。不過如果你去澳門時撞唔啱呢日,都一樣可以去大三巴哪吒廟朝聖,同埋睇返哪吒誕嘅盛事回顧。
人人都去大三巴,但好多人都唔知道,喺大三巴牌坊後面原來有座哪吒廟,1888年已經建成,歷年嚟維修過幾次,仲被列入為世界文化遺產景點之一,富有歷史價值同人文意義。
大三巴牌坊附近,多為葡式風格嘅歐陸建築,呢座傳統中式廟宇哪吒廟就更顯得特別。廟宇中間冇天井,牆身以青磚築成,感覺平實,裝飾唔多。喺廟嘅正殿中,供奉住唔同形態嘅哪吒神像。
從廟宇嘅左邊再行入去,就係免費畀公眾參觀嘅哪吒展館,主要介紹哪吒嘅傳說,同埋哪吒誕節慶活動。推門而入,可以見到哪吒誕中用過嘅香爐、哪吒印符、哪吒簽;出巡時嘅幢幡、舞獅頭等等,另外仲有由漫畫家繪創嘅8幅哪吒水墨漫畫,講返哪吒嘅神話故事。