相信大家對於孫中山呢個名一定唔會陌生，不過，除咗細個嗰陣佢生日有假放、十次武裝起義至有辛亥革命嘅成功等事蹟外，大家對孫中山嘅認識又有幾多呢？

醉心歷史嘅朋友，去到澳門就唔好放過中西藥局呢個免費入場參觀嘅歷史遺址喇。大約1892年前起落，後嚟孫中山就喺度開設藥局，懸壺濟世、贈醫施藥，仲係澳門歷史上最早記錄有華人開辦售賣西藥嘅藥店同西醫門診之一嚟！後嚟經澳門政府修復，咁就可以睇到唔少孫中山喺澳門嘅事跡喇。

藥局設計係典型嘅下舖上居式舖屋，樓高三層。地下嗰層一入去，就見到中間有條長坑，展示挖掘出嚟嘅地下同建築結構，旁邊亦有圖文並茂嘅層石結構解說，以及澳門街道嘅發展等等。

二樓同三樓分別展示咗孫中山喺澳門嘅行跡同澳門嘅重要歷史等，從中可見，澳門可以話係孫中山嘅啟蒙地。澳門呢個小小嘅地方，孕育咗佢嘅革命思想，亦係佢開始行醫嘅起點。