航空迷必到！新地標AIRSIDE大型展覽「想飛」 回顧舊機場歷史藏品+現代藝術品

啟德全新地標AIRSIDE嘅大型開幕展覽「想飛」Desire to Fly，展出多個舊機場歷史藏品外，更聯同21個本地藝術單位飛越想像界限，帶大家連結過去、現在同未來嘅時空旅程。展覽以「起飛」、「翱翔天際」同「降落」三部曲組成，藉著藝術家唔同媒介，包括影像、裝置、沉浸式互動設計等藝術作品，以飛翔之旅比喻追尋夢想，從舊物舊照見證時代變遷。各位航空迷可以飽覽由太古歷史檔案部、香港浸會大學圖書館藝術館，以及政府新聞處政府圖片資料庫借出嘅珍貴歷史藏品；另外本地收藏家、資深飛航人員嘅私人珍藏，包括機師珍而重之嘅飛行日誌、舊機場照片、旅遊海報、飛行地圖、舊機票、登機證等。

AIRSIDE地下更首次於香港商場內展出單引擎小型飛機「小獵犬100型」！佢曾於1971年由香港航空傳奇人物「錢氏兄弟」錢耀宗同錢耀昌駕駛，從英國出發遊遍14個國家，進行30日刺激嘅旅程，最後於1972年1月8日晚順利降落香港啟德機場31跑道，為香港航空歷史寫下三項飛行紀錄同一項世界紀錄，大家記得同佢打卡呀！

「想飛」Desire to Fly
日期：由即日起至2023年11月12日
地點：AIRSIDE商場2樓中庭及3樓GATE33藝文館、地下G/F
費用：免費
活動詳情：（按此）