Mira Place 打卡風車海　環保概念轉出好運牛年

今個農曆新年，大家都想吓風車行個好運。Mira Place 今年就有「如意風車海」，用200個浪漫風車幫你轉轉運，仲可以穿梭於風車海中，影出唯美風車相。而且全部風車都以環保紙材製造，環保地為大家帶來祝福，來年都一帆風順。

同場仲有「如意風車塔」、「持續幸福風車鞦韆」，影相位極多！於2月11日(年三十) 及14日(情人節) 仲會有型男驚喜登場，大派以FSC紙製成嘅環保小風車，想睇型男嘅就要Mark 低喇！

打卡位1「如意風車海」環保風車＋花牆
近年好多人都關注環保議題，更曾提出重用利是封嘅可行性。今次Mira Place 就喺傳統同環保之間作平衡，用FSC (Forest Stewardship Council™ 森林管理委員會) 認證環保紙張製造出風車海，美美嘅裝飾證明只要有心思，環保都可以好靚好有寓意。

打卡位2「如意風車塔」高達6米風車塔
風車海嘅另一邊就係高達6米嘅「如意風車塔」，係以桃花花蕊作為風車葉片，塔身則以大量金片點綴，祝願牛年桃花滿滿、財運亨通。

打卡位3「持續幸福風車鞦韆」超唯美
可以坐上幸福風車鞦韆，滿載桃花、健康同財富！鞦韆背景嘅風車，都係由FSC認證嘅2種創新環保紙材—Refit cotton 同Gmund Biocycle 製作而成，響應可持續發展同時寓意幸福連綿不斷。

Refit Cotton 成份包括消費後廢料同棉纖維，整個製作過程都用上EKOenergy 認證嘅再生能源；Gmund Biocycle 原物料主要成分則為草，相較樹木嘅生長循環週期短約7倍，大大減少對環境造成嘅破壞，同摯愛打卡共享新春喜悅嘅同時，記住要一齊關愛同保護地球呀。

Mira Place「如意風車海」新春裝置詳情
日期：即日起至2月25日
地點：Mira Place 1 中庭